My title

ధర్మప్రచారం

బుద్ధుడు అప్పటివరకు తయారైన అరవై ఒక్కమంది అర్హతులను బుద్ధుడు సమావేశపరిచాడు. వారితో మాట్లాడుతూ ”భిక్షువులారా, నేను దైవ, మానవ సంబంధాల నుంచి విముక్తుడ నయ్యాను. నాలాగే మీరు కూడా విముక్తులయ్యారు. ఈ లోకంలో తక్కువ వ్యసనాలు కలిగినవారు, కోర్కెలు లేనివారూ ఉన్నారు. ధర్మాన్ని వినడానికి కుతూహలపడేవారూ

ఉన్నారు. మనం చెబితే వాళ్ళు ధర్మాన్ని బాగా అర్థం చేసుకోగలరు. కాబట్టి మీరంతా ఇతర ప్రాంతాలకు వెళ్ళి ధర్మప్రచారం చేయండి. మీరు కరుణతో బహుజన హితం కోసం, బహుజన సుఖం కోసం ఈ ధర్మాన్ని బోధించండి. సమగ్రమైన, సంపూర్ణమైన, పవిత్రమైన జీవితాన్ని అందించే ఈ ధర్మం గురించి వివరించండి” అని చెబుతూ కొత్తగా సంఘంలో చేరేవారికి దీక్ష ఇవ్వడానికి కూడా భిక్షువులకు అనుమతి యిచ్చాడు. ‘మీలో ఏ ఇద్దరూ కలసి ఒకే మార్గంలో వెళ్ళవద్దు’ అని చెప్పి తాను స్వయంగా ధర్మబోధ చేయడానికి తాను సంబోధి పొందిన ప్రదేశం ఉరువేలకు వెళ్ళాడు.

అక్కడ వివిధ ధర్మాలను విశ్వసించే ఆచార్యులు, సన్యాసులు, జటిలురతో వాదించి, వారిని ఓడించి, తను కనుగొన్న ధర్మాన్ని బోధించి, వారిలో చాలామందిని భిక్షువులుగా చేసుకున్నాడు. ముఖ్యంగా జటాధారులైన జటిలురు (గృహస్థ జీవితాన్ని త్యజించి సన్యాసం స్వీకరించిన తర్వాత కూడా యజ్ఞయాగాదులను నిర్వహించే బ్రాహ్మణులను ‘జటిలురు’ అంటారు) వెయ్యిమంది బౌద్ధ ధర్మాన్ని స్వీకరించారు.

వారందరికీ బుద్ధుడు గయాశీర్షం అనే చోట ‘ఆదిత్య పరియాయ’ సూత్రాన్ని బోధించాడు.

ఈ లోకం ద్వేషాగ్నితో, రాగాగ్నితో, మోహాగ్నితో, దుఃఖాగ్నితో, జనన, జరా, మరణాగ్నులతో దహించుకుపోతున్నది. సుఖం, బాధ, ఆనందం, దుఃఖం, మనసు, మనోధర్మాలు, మనో విజ్ఞానాలు, సంస్పర్శలు, సంస్పర్శాజనిత వేదనలు అన్నీ దహించుకు పోతున్నాయి. అది గుర్తెరిగిన మనిషి నిర్వేదం పొంది, ఆ నిర్వేదం ద్వారా విముక్తి పొందు తున్నాడని ఆదిత్య పరియాయ సూత్రం బోధిస్తుంది.

జీవితం దుఃఖమయం అని భావించి, జీవితంలో లభించే సుఖాలకు దూరం కావాలా? అనే ప్రశ్న వస్తుంది. అయితే ఈ సుఖాలన్నీ ఎండమావులు. సుఖం ముసుగు వేసుకున్న దుఃఖాలు. దుఃఖం మరణంతో కూడా అంతం కాదు. పునర్భవంలో కూడా అది మీ వెంటే ఉంటుంది. అలా జన్మ తర్వాత జన్మలో కూడా అది మిమ్మల్ని వెంబడిస్తుంది. కాబట్టి నిర్వాణం పొందడం ద్వారా జన్మరాహిత్య స్థితిని సాధించాలి అంటుంది బౌద్ధ ధమ్మం.

Leave a Reply

Your email address will not be published.

twelve + nineteen =