వాళ్లకే రైతుబంధు.. తేల్చేసిన తుమ్మల

ఇక నుంచి పంట వేసిన వాళ్లకే పెట్టుబడి సాయం అందిస్తామని రాష్ట్ర వ్యవసాయ మంత్రి తుమ్మల నాగేశ్వరరావు స్పష్టంచేశారు. రైతుబంధు ఎవరికి, ఏ విధంగా ఇవ్వాలనే అంశంపై వచ్చే శాసనసభ సమావేశాల్లో చర్చించి విధివిధానాలు రూపొందిస్తామన్నారు. వివిధ వర్గాల అభిప్రాయాలను పరిగణనలోకి తీసుకుంటామన్నారు. ఈ నెలాఖరు వరకు అర్హులందరికీ రైతుబంధు సాయాన్ని అందజేస్తామన్నారు తుమ్మల.

రాష్ట్రంలో కోటీ 11 లక్షల యాభై వేల ఎకరాలకు గాను 64.77 లక్షల మంది రైతులకు రూ.5,574.77 కోట్ల రైతుబంధు సాయాన్ని జమ చేశామన్నారు తుమ్మల నాగేశ్వరరావు. మరో 4 లక్షల మందికి ఈ నెలాఖరులోగా అందిస్తామన్నారు. పెట్టబడిసాయాన్ని మొదట గుంటలవారీగా జమ చేస్తూ వచ్చింది ప్రభుత్వం. సంక్రాంతి ముందు వరకు కూడా నిధులు జమ స్పీడ్‌గా జరగలేదు. పండగ తర్వాత జమ ప్రక్రియను వేగవంతం చేసింది సర్కార్. ప్రస్తుతం 5 ఎకరాల్లోపు భూమి ఉన్న రైతుల ఖాతాల్లో నిధులు జమ అయినట్లు ప్రభుత్వం చెప్తోంది.

మిగిలిన రైతులకు కూడా పెట్టుబడి సాయం అందిస్తామని ప్రభుత్వం చెప్తున్నా.. ఇచ్చేవరకు నమ్మకం లేదని ప్రతిపక్షాలు విమర్శిస్తున్నాయి. 5 ఎకరాల కంటే ఎక్కువ భూమి ఉన్న రైతుల ఖాతాల్లో డబ్బులు జమ అవుతాయా? లేదా? అన్న దానిపై ఆందోళన వ్యక్తం అవుతోంది. నిధుల జమ ప్రక్రియపై ప్రభుత్వంలోని మంత్రులు భిన్నమైన ప్రకటనలు చేస్తుండటం అనుమానాలకు తావిస్తోంది.