Sampoornesh Babu | సంపూ రీమేక్ ప్రాజెక్టు రెడీ

కొన్నాళ్లుగా స్తబ్దుగా ఉన్నాడు సంపూర్ణేష్ బాబు. అతడి ఇమేజ్ కు తగ్గట్టు సరైన సినిమా పడడం లేదు. అందుకే సంపూర్ణేష్ కూడా గ్యాప్ తీసుకున్నాడు. మంచి సబ్జెక్ట్ కోసం వెయిట్ చేస్తున్నాడు. ఇన్నాళ్లకు అతడి నిరీక్షణ ఫలించింది. ఓ సూపర్ హిట్ సినిమా రీమేక్ లో నటిస్తున్నాడు సంపూర్ణేష్ బాబు.

యోగి బాబు మండేలా ఇటీవలి కాలంలో వచ్చిన సర్ ప్రైజ్ హిట్స్ లో ఒకటి. ఈ పొలిటికల్ సెటైర్ చిత్రంలో యోగి బాబు ప్రధాన పాత్రలో నటించాడు. నేటి రాజకీయాలకు సంబంధించిన సబ్జెక్ట్ కావడంతో కంటెంట్ అందరికీ కనెక్ట్ అయింది. ఊహించిన దానికి మించి ప్రశంసలు అందుకుంది ఈ సినిమా. గ్రామ పంచాయతీ ఎన్నికల సమయంలో కేంద్రంగా మారిన మండేలా అనే గ్రామంలోని ఓ క్షురకుడు జీవితం ఎలా మారిందనే కోణంలో ఈ కథ సాగింది.

తమిళనాట విమర్శకుల ప్రశంసలు అందుకున్న ఈ సినిమా, ఇప్పుడు తెలుగులో సంపూర్ణేష్ బాబు టైటిల్ రోల్ లో రీమేక్ కానుంది. ఈ పొలిటికల్ సెటైర్‌లో నటుడు నరేష్ కూడా కీలక పాత్రలో కనిపించనున్నారు. తెలుగులో ఈ చిత్రానికి మార్టిన్ లూథర్ కింగ్ అనే టైటిల్ పెట్టారు. వై నాట్ స్టూడియోస్ సోషల్ మీడియాలో అధికారిక ప్రకటన చేసింది.

పూజ కొల్లూరు ఈ చిత్రానికి దర్శకత్వం వహిస్తుండగా, కేరాఫ్ కంచరపాలెం సినిమాకు దర్శకత్వం వహించిన వెంకటేష్ మహా, ఈ చిత్రానికి క్రియేటివ్ ప్రొడ్యూసర్ గా వ్యవహరిస్తున్నాడు. దీనిని ఎస్ శశికాంత్, రామచంద్ర చక్రవర్తి నిర్మాతలుగా వ్యవహరిస్తున్నారు.

యోగి బాబు నటించిన మండేలా.. 2 జాతీయ అవార్డులను గెలుచుకుంది. ఉత్తమ స్క్రీన్‌ప్లే, ఉత్తమ నూతన దర్శకుడిగా ఈ సినిమాకు నేషనల్ అవార్డ్స్ వచ్చాయి. అలాంటి సినిమాలో సంపూర్ణేష్ బాబు నటిస్తున్నాడు. అక్టోబర్ 27న విడుదలవుతున్న మార్టిన్ లూథర్ కింగ్ ఎలా ఉంటుందో చూడాలి.