Rajinikanth: ఫ్యాన్స్‌కి రజనీ స‌ర్‌ప్రైజ్‌.. ఒకేసారి రెండు సినిమాల ప్రకటన

తమిళ సూపర్ స్టార్ రజనీకాంత్ కొన్నేళ్లుగా సినిమాల సంఖ్యను బాగా తగ్గించాడు. ఆయన గత ఏడాది న‌టించిన‌ పెద్దన్న సినిమా దారుణ ఫలితాన్ని ఇచ్చింది. దీంతో చాలా నెలల పాటు మరో సినిమాను అంగీకరించలేదు రజనీ. ఆ తర్వాత ఆయన సినిమాలకు గుడ్ బై చెప్పాడన్న ప్రచారం కూడా జరిగింది. అంతలోనే ఆయన నెల్సన్ దిలీప్ కుమార్ దర్శకత్వంలో జైలర్ అనే సినిమాను ప్రారంభించారు. ప్రస్తుతం ఈ సినిమా రెగ్యులర్ షూటింగ్ జరుగుతోంది.

రజనీకాంత్ ఇప్పుడు అభిమానులకు డబుల్ స‌ర్‌ప్రైజ్‌ ఇచ్చాడు. ఒకేసారి రెండు సినిమాలు ప్రారంభించనున్నట్లు ప్రకటించాడు. గతంలో ఆయనతో రోబో 2.0 అనే సినిమాను నిర్మించిన లైకా ప్రొడక్షన్స్ సంస్థ ఈ రెండు సినిమాలను నిర్మించనుంది. శుక్రవారం లైకా ప్రొడక్షన్స్ అధినేతలు సుభాస్కరన్, ప్రేమ్ శివ స్వామి రజనీకాంత్‌ను ఆయన నివాసంలో కలిశారు. ఆ తర్వాత రజనీకాంత్‌తో వారు చేయబోయే సినిమాల గురించి ప్రకటించారు.

నవంబర్ 5వ తేదీన చెన్నైలో పూజా కార్యక్రమాలతో రెండు సినిమాలను లాంఛనంగా ప్రారంభించనున్నట్లు వారు తెలిపారు. రజనీకాంత్ నటించే రెండు సినిమాలకు దర్శకులు, ఆ సినిమాల్లో నటించే హీరోయిన్లు, ఇతర సాంకేతిక నిపుణులకు సంబంధించిన వివరాలను అతి త్వరలోనే ప్రకటించనున్నారు. 2.0 లాగానే ఈ రెండు సినిమాలను భారీ బడ్జెట్‌తో లైకా ప్రొడక్షన్స్ సంస్థ నిర్మించనుంది. రజనీ తాజాగా చేస్తున్న జైలర్ మూవీ వచ్చే ఏడాది వేసవి కానుకగా విడుదల కానుంది.